காதல் பொழி

லேசாக மழை தூற ஆரம்பித்திருந்தது
சாத்திய கதவைத் திறக்கச்சொல்லி
ஏதோ உரிமையோடு ஜன்னலைத் தட்டுகிறது…
சூறாவளிக்காற்று

மழைத்துளி சப்தம்
உன் பேச்சை நினைவுபடுத்தியது
நீ ஊர் வரும்போதெல்லாம்
இலவச இணைப்பாகக் கிடைக்கும்…
இனிப்பான முத்தம்
குளிரை மறைத்து விடும்…
வெதுவெதுப்பான உன் பேச்சு

மழை இப்போது…
அடைமழையாகியிருந்தது.


Categories: காதலி

பசித்திரு

தெறிக்கிற ஒவ்வொரு துளியிலும்
முளைக்கும் சக்தி –இராவணின்
இரத்தத்திற்கு மட்டுமில்லை…
என் வியர்வைத்துளிக்கு கூட
அந்த வீரியம் உண்டு

Categories: வேகம்

ரகசிய நதி

நாமிருவரும் நல்ல நண்பர்களென்று
ஏறத்தாழ எல்லோருமே
ஞாபகப்படுத்தினார்கள்

அப்போது மழையுமில்லை – அது
இரவுமில்லை…
எந்தக்காரணியுமின்றியே…
மிக எதேச்சையாக
நாம் உரசினோம்

தொடுதலின் சிறந்த பரிமாணத்தை
உன் விரல்கள் எனக்கு விளக்கின
பெண்மையின் அழகிய பரிசை
கேட்காமலே எடுத்துக்கொண்டாய்

திரும்பவும் பல நாட்களுக்கு
ஏனோ சொல்லிக்கொண்டோம்…
நாமிருவரும் நல்ல நண்பர்களென்று

Categories: காமம்

மலர்ச்சுமை

வெறிச்சோடிய மனது…
முடிக்கப்படாத கவிதை…
மூடப்பட்ட டைரி…
எறிந்து விட்ட பேனா…
உதிர்ந்து போன பூக்கள்…
அழுது தோற்ற தோழி…
நடந்து முடிந்த திருமணம்…
எல்லாமும் ஒன்றே ஒன்றைத்தான்
ஞாபகப்படுத்துகின்றன

சொல்லியிருக்க வேண்டிய வார்த்தைகள்

Categories: கண்ணீர்

காதல் மொழி

அந்த சில மணித்துளிகளில்…
அழகிகளும், கவிஞர்களும் பிறக்கிறார்கள்
இறப்பவர்கள் சொர்க்கம் சேர்கிறார்கள்

உலகம் எவ்வளவு இருளிலிருப்பினும்
லேசான அதீத வெளிச்சம் பரவுகிறது

ஏதோ அற்புதம் நிகழ்வதாய்
நிறைய பேர் உணருவார்கள்
பூக்களும், குழந்தைகளும்
மேக்-அப் பூசிக்கொள்ளும்

சாக்கடை, சிகரெட் நாற்றங்களை
புமி பிரபஞ்சத்தில் துப்புகிறது

எல்லா தேவதைகளும் நம்மை சுற்றி
ஒளிந்திருந்து ஒட்டு கேட்கிறார்கள்
என்னிடம் நீ பேசும் அந்த சில
மணித்துளிகளில்..


Categories: காதலி

தயக்கம்

என்னுடைய
முடிவில்லாத காதலின்
தொடக்கமாய்
நீ பேச ஆரம்பிக்கிறாய்...

எத்தனை எத்தனையோ
வண்ணங்களை
உன் இதழிலும், கையசைவிலும்
என் மேல் தெளிக்கிறாய்

வியர்த்து சலித்திருக்கும்போது
வீசும் மெல்லிய தென்றல் போல
அவ்வப்போது உன் பேச்சில்
என் மனதையும் வசீகரிக்கிறாய்

இன்னமும் ஆரம்பிக்காத
உன் காதலின் முடிவிலியாய்...
நான் மௌனமாகவே இருக்கிறேன்

Categories: காதலி