தொலை(ந்து போன)காட்சியோடு

முகவரி மறக்கப்பட்டதொரு பாடலோடே
இதயத்தை அதிர்வுக்குள்ளாக்கும்...
ஏன் எதற்கென்றே தெரியாமல் ஆரம்பித்து
அவசரமாக முடிக்கப்பட்டதொரு பழைய காதலின் சொச்சம்

கதறுதலுமில்லாது உதறுதலுமியலாது
உறுத்தும் வலி மாற்றப்படும்...
தற்காலிகமாக வேறு சேனலுக்கு

குடும்பமே அதிசயமாய்ப் பார்த்த
குட்டியைத் தாடையால் கவ்வி
அரவணைத்துப் போய்க்கொண்டிருந்த
அம்மிருகத்தைப் பார்க்கையில் தோன்றியது...
"அது நான் தானோ"

Categories: girl

sweet nothings

கண்ணாடி என்பதற்கு
அர்த்தம் கேட்டாய்
கண்கள் என்றேன் - மறுத்து விட்டு
கவிதை என்றாய்

பூக்களுக்கு வேறு பெயர் கேட்டாய்
உன் புன்னகை என்றேன்
தவறென்று தலையாட்டி - புல்லின் மேல்
பனித்துளி என்றாய்

வெட்கத்திற்கு எதிர்ச்சொல் கேட்டாய்
நீ என்றேன்...
அடித்து விட்டாய்!

முத்தத்திற்கு விளக்கம் கேட்டாய்
எனக்கெதற்கு வம்பு...?
தெரியாது என்றேன்!
வெட்கத்தோடு தலை குனிந்து
வேகமாய்க் கேட்டாய்...
"கற்றுத் தரவா?" என்று.

Categories: காதலி